الجمعة، 10 أغسطس 2012

شيكولاتة جلاكسي

بمناسبة شهر رمضان
احب اقول لكل ست
بتنكد على جوزها و هما رايحين بيت اهله بحجة ان مرات بواب العمارة بتاعة ابوه بتبصلها بصات غربية من ساعة مكانو مخطوبين.
و لكل ست
بتقول لخطيبها انهم لازم ينفصلو علشان حاسه انها مش هاتقدر تكمل  لان هو معادشي بيعاملها زي اول مكانو مخطوبين.
و لكل ست
بتقول لجوزها انها نفسها في حاجة جديدة و زهقانة و في النهاية ترفض كل الحلول المقترحة و توافق بس انهم يروحو يلفو في سيتي ستارز اللي لسه راجعين منه من يومين.
و لكل ست
بتقول لصاحبها ارجوك سيبني لوحدي شوية و ترجع تنكد عليه اخر الليل علشان مش بيديها الاهتمام الكافي و سابها و خرج مع صحابه.
و لكل ست و خلاص احب اقول:
لما الراجل يطفش منك ...........ابقي خلي شيكولاتة جلاكسي تنفعك.