طعم القهر

مصر اختارتلي طعم القهر
لان انا شفيق قهرني يوم موقعة الجمل
 لما صحيت من النوم يومها الساعة اتنين الضهر كان بقالي يومين قبلها مانمتش في الميدان
و الاقي الميدان بيتعمل  فيه كل ده
و انا قاعد في البيت و مش عارف اعمل ايه
و اسمع من كل الناس ان الميدان متحاصر و مش عارف اروحه
واقعد عاجز في البيت بحسرتي
و بخوفي من بلطجيته


مصر اختارتلي طعم القهر

لان انا شفيق قهرني تاني يوم الصبح
لما نزلت و قولت ان العمر واحد
وخدت دوا و شاش للميدان
و وانا داخل اتهددت بالقتل من بلطجية شفيق
و اتاخد مني الدوا
و مشيت و انا عاجز هربان بعمري و مش قادر اقولهم حاجة و هما بياخدو مني الدوا و الشاش و بيقولوا لو مش عايز تموت امشي دلوقتي لاننا هانموت كل اللي جوا
و هربت و انا مقهور و متاخد مني كرامتي مع الدوا اللي معرفتش اوقفهم انهم يكسروه و يرموه في الزبالة

مصر اختارتلي طعم القهر
لان انا شفيق قهرني لما عرفت ادخل الميدان
و شفت صاحبي اللي كانت عينه هاتروح من طوب بلطجيته اللي بعتهم على الميدان
قهرني لما حسيت اني مكنتش معاه و هو بيتضرب و معرفتش اروحله
و قهرني لما حسيت اني معرفتش حتى ادخله بدوا!

مصر اختارتلي طعم القهر
لان شفيق في نفس الليلة اصدر اوامر باعتقالي
علشان كنت خارج "من بيت فلان اللي متابع و اللي بيباشر عمل ضد امن الدوله" على حد قوله، كنا فعلا بنخطط ضد دولته هو و امنه هو لكن ربنا سترها معايا من عنده اني وقفت في كمين شرطة و اتفتشت انا و اللي معايا لمدة نص ساعة و محصلتش زمايلنا اللي اعتقلو في المطعم اللي كنا رايحينه سوا
و شفيق بيتني يومها في بيتي مقهور
لاني كنت عرفت ان زمايلي اعتقلوا و مش عارف اعمل ايه و مش عارف حتى يا ترى هايعتقلوني بليل ولا هايستنوا لبكرة ؟

مصر اختارتلي طعم القهر لكن انا مش هاشتريه
لان طعم القهر اللي حسيته مع شفيق هو اللي هايحسه ان شاء الله لما يعرف انه هو اللي  هايتحاسب على كل اللي قهرهم و الاهم انه هايتحاسب على كل اللي حسسهم بطعم امر ... طعم الدم